Film Review Juman Ji

مشہور ہالی ووڈ فلم سیریز جمانجی تو بہت سے لوگوں نے دیکھ رکھی ہوگی تو آج میں اسی پر ریویو لے کر حاضر ہوا ہوں۔

 اس سیریز کا آغاز 1981 میں کرس وان آلزبرگ کی بچوں کی کتاب "جمانجی" سے ہوا جس پر بعد میں فلمیں بنائی گئیں۔

اس سیریز کی پہلی فلم "جمانجی" 1995 میں ریلیز ہوئی جس میں رابن ولیمز نے مرکزی کردار ادا کیا۔ کہانی ایک میجیکل بورڈ گیم کے گرد گھومتی ہے جو حقیقت میں جنگل کی مخلوقات اور خطرات کو لے آتا ہے۔ فلم کو اس کی منفرد کہانی کی وجہ سے کامیابی ملی۔ فلم کا بجٹ 65 ملین ڈالر تھا اور باکس آفس پر 263 ملین ڈالرز کا بزنس کرنے میں کامیاب رہی IMDB  پر اس کی ریٹنگ 7.1 ہے اور میری طرف 7 ہے۔

مجھے اس فلم میں کچھ خاص دیکھنے کو نہیں ملا سواۓ پیٹر کا کردار ادا کرنے والے کیوٹ سے بچے اور سارا کا کردار ادا کرنے والی سندر سی لڑکی کے۔

اس فلم کے اداکار اب بوڑھے ہو چکے ہیں لیکن مجھے سب سے زیادہ افسوس سارا کا کردار ادا کرنے والی اداکارہ کو دیکھ کر ہوا کہ اتنی کیوٹ اور سندر لڑکی بھی آخر کبھی بوڑھی ہو سکتی ہے۔

 22 سال بعد، 2017 میں اس سیریز کی دوسری فلم "جمانجی: ویلکم ٹو دی جنگل" ریلیز ہوئی۔ اس بار کہانی کو ماڈرن ایرا میں دکھایا گیا جہاں میجیکل بورڈ گیم اب میجیکل ویڈیو گیم میں تبدیل ہو چکا ہے اور  چار ٹین ایجرز سٹوڈنٹس حادثاتی طور پر اس گیم میں پہنچ جاتے ہیں اور انہیں مختلف اوتارز میں جمانجی کی دنیا میں زندہ رہنا ہوتا ہے۔ ڈوین جانسن، کیون ہارٹ، جیک بلیک، نک جونیز اور کیرن گیلن نے اہم کردار ادا کیے۔ فلم کو ناظرین اور ناقدین نے پسند کیا خاص طور پر اس کی مزاحیہ اور ایڈونچر سے بھرپور کہانی کی وجہ سے۔

اس فلم نے باکس آفس پر دھوم مچائی اور 960 ملین ڈالرز سے زیادہ بزنس کیا۔ IMDB  پر اس کی ریٹنگ 7 ہے جبکہ میری طرف سے 7.6 ہے۔

2019 میں صرف دو سال بعد تیسری فلم "جمانجی دی نیکسٹ لیول" ریلیز ہوئی جس میں پچھلی فلم کے کردار دوبارہ جمانجی کی دنیا میں داخل ہوتے ہیں حالانکہ کوئی بھی اس داخل ہونا تو دور کی بات اس گیم کو دیکھنا بھی نہیں چاہتا۔ صرف ایک لڑکا جو بور ہو رہا ہوتا ہے وہ ٹوٹی ہوئی گیم کو اٹھا کر لے آتا ہے اور اپنی بوریت مٹانے کے لیے گیم سٹارٹ کر دیتا ہے اور جمانجی میں پہنچ جاتا ہے اور اس کے دوست اسے ڈھونڈنے کے لیے مجبوراً گیم میں کودتے ہیں لیکن اس بار نئے چیلنجز اور مشکلات کا سامنا کرتے ہیں۔ اس بار بھی کامیڈی اور ایڈوینچر کا لیول ذرا سا بھی کم نہیں ہوتا۔ IMDB پر اس کی ریٹنگ 6.7 ہے اور میری طرف سے 7.2 ہے۔

فلم نے باکس آفس پر 800 ملین ڈالرز سے زیادہ کا بزنس کر کے کامیابی حاصل کی اور سیریز کی مقبولیت کو مزید بڑھایا۔

جمانجی فرنچائز والوں نے وقت کے ساتھ اپنی فلموں کو نئے انداز میں پیش کیا ہے جس کی وجہ سے یہ نئی جنریشن کے ناظرین میں بھی سپر ہٹ رہی ہیں۔ پہلی فلم کی کلاسک کہانی سے لے کر نئی فلموں کی ٹیکنیکل جدت تک، اس سیریز نے ایڈونچر اور کامیڈی کا بہترین کمبینیشن پیش کیا۔ 

ڈوین جانسن، کیون ہارٹ، جیک بلیک اور کیرن گیلن کی کیمسٹری اور اداکاری نے نئی فلموں کو دلچسپ بنایا۔

جمانجی سیریز کی مقبولیت کو دیکھتے ہوئے مستقبل میں مزید سیکوئلز کی امید کی جا سکتی ہے۔

جمانجی فلم سیریز ایڈونچر اور فینٹسی کے شائقین کے لیے بہترین ٹائم پاس ہے۔ اگر آپ نے یہ فلمیں نہیں دیکھی ہیں، تو یہ سیریز یقینی طور پر دیکھنے کے لائق ہے۔